फरक..!
फरक..!
लोळे सुख दारी कुणाच्या,
कुणी लोळे सुखाच्या दारी !
शिगलोड भरली घरे कुणाची,
कुणी फिरतोय दारोदारी !!
ताज कुणाच्या मस्तकावरी,
कुणाच्या टाळूवर जोडे !
थांबणारे हात कुणाचे,
कुणी म्हणे द्या अजून थोडे !!
लोळतात कुणी गादीवर,
पायतळी कुणी लुडबुडे !
लंबोदरावरी हात कुणाचा,
पसरलेत कुणी हात पुढे !!
बिनकामाचा घाम कुणाला,
शोधीत फिरतो कुणी काम !
घाली वारा यंत्र कुणाला,
सोग्याने पुसतो कुणी घाम !!
स्वार्थ दडला उरी कुणाच्या,
विश्वाचा असे कुणाला ध्यास !
कमवी कुणी पिढ्यानपिढ्याचे,
फक्त पोटाचा कुणा हव्यास !!
◆◆◆◆◆